Текст православной вечерней молитвы

Предлагаем ознакомиться: Текст православной вечерней молитвы с точным и подробным описанием.

Востав от сна, прежде всякого другого дела, стань благоговейно, представляя себя пред Всевидящим Богом, и, совершая крестное знамение, произнеси:

Во и́мя Отцá, и Сы́на, и Святáго Ду́ха. Ами́нь.

Затем немного подожди, пока все чувства твои не придут в тишину и мысли твои не оставят все земное, и тогда произноси следующие молитвы, без поспешности и со вниманием сердечным:

(Евангелие от Луки, глава 18, стих 13)

Бóже, ми́лостив бу́ди мне грéшному. (Поклон)

Гóсподи Иису́се Христé, Сы́не Бóжий, моли́тв рáди Пречи́стыя Твоея́ Мáтере и всех святы́х, поми́луй нас. Ами́нь.

Слáва Тебé, Бóже наш, слáва Тебé.

Царю́ Небéсный, Утéшителю, Ду́ше и́стины, И́же вездé сый и вся исполня́яй, Сокрóвище благи́х и жи́зни Подáтелю, прииди́ и всели́ся в ны, и очи́сти ны от вся́кия сквéрны, и спаси́, Блáже, ду́ши нáша [1] .

Святы́й Бóже, Святы́й Крéпкий, Святы́й Безсмéртный, поми́луй нас. (Читается трижды, с крестным знамением и поясным поклоном.)

Слáва Отцу́ и Сы́ну и Святóму Ду́ху, и ны́не и при́сно и во вéки векóв. Ами́нь.

Пресвятáя Трóице, поми́луй нас; Гóсподи, очи́сти грехи́ нáша; Влады́ко, прости́ беззакóния нáша; Святы́й, посети́ и исцели́ нéмощи нáша, и́мене Твоегó рáди.

Óтче наш, И́же еси́ на небесéх! Да святи́тся и́мя Твоé, да прии́дет Цáрствие Твоé, да бу́дет вóля Твоя́, я́ко на небеси́ и на земли́. Хлеб наш насу́щный дáждь нам днесь; и остáви нам дóлги нáша, я́коже и мы оставля́ем должникóм нáшим; и не введи́ нас во искушéние, но избáви нас от лукáваго.

Востáвше от сна, припáдаем Ти, Блáже, и áнгельскую песнь вопиéм Ти, Си́льне: Свят, Свят, Свят еси́, Бóже, Богорóдицею поми́луй нас.

Слава: От одрá и сна воздви́гл мя еси́, Гóсподи, ум мой просвети́ и сéрдце, и устнé мои́ отвéрзи, во éже пéти Тя, Святáя Трóице: Свят, Свят, Свят еси́, Бóже, Богорóдицею поми́луй нас.

И ныне: Внезáпно Судия́ прии́дет, и коегóждо дея́ния обнажáтся, но стрáхом зовéм [3] в полу́нощи: Свят, Свят, Свят еси́, Бóже, Богорóдицею поми́луй нас.

[1] От Пасхи до Вознесения вместо этой молитвы читается тропарь: «Христóс воскрéсе из мéртвых, смéртию смерть попрáв, и су́щим во гробéх живóт даровáв» (Трижды).

От Вознесения до Троицы начинаем молитвы со «Святы́й Бóже. », опуская «Слáва Тебé, Бóже наш, слáва Тебé» и «Царю́ Небéсный́».

Это замечание относится и к молитвам на сон грядущим.

[2] Когда написано «Слáва:», «И ны́не:», надо читать полностью: «Слáва Отцу́ и Сы́ну и Свято́му Ду́ху», «И ны́не и при́сно и во вéки векóв. Ами́нь».

[3] В церковнославянском языке нет звука ё, а поэтому надо читать «зовéм», а не «зовём», «твоé», а не «твоё», «моé», а не «моё», и т. д.

От сна востáв, благодарю́ Тя, Святáя Трóице, я́ко мнóгия рáди Твоея́ блáгости и долготерпéния не прогнéвался еси́ на мя, лени́ваго и грéшнаго, нижé погуби́л мя еси́ со беззакóньми мои́ми; но человеколю́бствовал еси́ обы́чно и в нечáянии лежáщаго воздви́гл мя еси́, во éже у́треневати и славослóвити держáву Твою́. И ны́не просвети́ мои́ óчи мы́сленныя, отвéрзи моя́ устá поучáтися словесéм Твои́м, и разумéти зáповеди Твоя́, и твори́ти вóлю Твою́, и пéти Тя во исповéдании сердéчнем, и воспевáти всесвятоé и́мя Твоé, Отцá и Сы́на и Святáго Ду́ха, ны́не и при́сно и во вéки векóв. Ами́нь.

Прииди́те, поклони́мся Царéви нáшему Бо́гу. (Поклон) Прииди́те, поклони́мся и припадéм Христу́, Царéви нáшему Бóгу. (Поклон) Прииди́те, поклони́мся и припадéм Самому́ Христу́, Царéви и Бóгу нáшему. (Поклон)

1 Вéрую во еди́наго Бóга Отцá, Вседержи́теля, 2 Творцá нéбу и земли́, ви́димым же всем и неви́димым. 3 И во еди́наго Го́спода Иису́са Христа́, Сы́на Бо́жия, Единоро́днаго, И́же от Отца́ рожде́ннаго пре́жде всех век; Све́та от Све́та, Бо́га и́стинна от Бо́га и́стинна, рожде́нна, несотворе́нна, единосу́щна Отцу́, И́мже вся бы́ша. Нас рáди человéк и нáшего рáди спасéния сшéдшаго с небéс и воплоти́вшагося от Ду́ха Свя́та и Мари́и Дéвы, и вочеловéчшася. 4 Распя́таго же за ны при Понти́йстем Пилáте, и страдáвша, и погребéнна. 5 И воскрéсшаго в трéтий день по Писáнием. 6 И возшéдшаго на небесá, и седя́ща одесну́ю Отцá. 7 И пáки гряду́щаго со слáвою суди́ти живы́м и мéртвым, Егóже Цáрствию не бу́дет концá. 8 И в Ду́ха Святáго, Гóспода, Животворя́щаго, И́же от Отцá исходя́щаго, И́же со Отцéм и Сы́ном спокланя́ема и сслáвима, глагóлавшаго прорóки. 9 Во еди́ну Святу́ю Собóрную и Апóстольскую Цéрковь. 10 Исповéдую еди́но крещéние во оставлéние грехóв. 11 Чáю воскресéния мéртвых, 12 и жи́зни бу́дущаго вéка. Ами́нь.

Бóже, очи́сти мя грéшнаго, я́ко николи́же сотвори́х благóе пред Тобою; но избáви мя от лукáваго, и да бу́дет во мне вóля Твоя́, да неосуждéнно отвéрзу устá моя́ недостóйная и восхвалю́ и́мя Твоé святóе, Отцá и Сы́на и Святáго Ду́ха, ны́не и при́сно и во вéки векóв. Ами́нь.

От сна востáв, полу́нощную песнь приношу́ Ти, Спáсе, и припáдая вопию́ Ти: не даждь ми усну́ти во грехо́вней смéрти, но ущéдри мя, распны́йся во́лею, и лежáщаго мя в лéности ускори́в возстáви, и спаси́ мя в предстоя́нии и моли́тве, и по сне нощнéм возсия́й ми день безгрéшен, Христé Бóже, и спаси́ мя.

К Тебé, Влады́ко Человеколю́бче, от сна востáв прибегáю, и на делá Твоя́ подвизáюся милосéрдием Твои́м, и молю́ся Тебé: помози́ ми на вся́кое врéмя, во вся́кой вéщи, и избáви мя от вся́кия мирски́я злы́я вéщи и диáвольскаго поспешéния, и спаси́ мя, и введи́ в Цáрство Твоé вéчное. Ты бо еси́ мой Сотвори́тель и вся́кому блáгу Промы́сленник и Подáтель, о Тебé же все уповáние моé, и Тебé слáву возсылáю, ны́не и при́сно и во вéки векóв. Ами́нь.

Гóсподи, И́же мнóгою Твоéю блáгостию и вели́кими щедрóтами Твои́ми дал еси́ мне, рабу́ Твоéму, мимошéдшее врéмя но́щи сея́ без напáсти прейти́ от вся́каго злá проти́вна; Ты Сам, Влады́ко, вся́ческих Твóрче, сподóби мя и́стинным Твои́м свéтом и просвещéнным сéрдцем твори́ти вóлю Твою́, ны́не и при́сно и во вéки векóв. Ами́нь.

Гóсподи Вседержи́телю, Бóже сил и вся́кия плóти, в вы́шних живы́й и на смирéнныя призирáяй, сердцá же и утрóбы испыту́яй и сокровéнная человéков я́ве предвéдый, Безначáльный и Присноу́щный Свéте, у Негó же несть пременéние, или́ преложéния осенéние; Сам, Безсмéртный Царю́, приими́ молéния нáша, я́же в настоя́щее врéмя, на мнóжество Твои́х щедрóт дерзáюще, от сквéрных к Тебé устéн твори́м, и остáви нам прегрешéния нáша, я́же дéлом, и слóвом, и мы́слию, вéдением, или невéдением согрешéнная нáми; и очи́сти ны от вся́кия сквéрны плóти и ду́ха. И дáруй нам бóдренным сéрдцем и трéзвенною мы́слию всю́ настоя́щаго жития́ нощь прейти́, ожидáющим пришéствия свéтлаго и явлéннаго дне Единорóднаго Твоегó Сы́на, Гóспода и Бóга и Спáса нáшего Иису́са Христá, в óньже со слáвою Судия́ всех прии́дет, кому́ждо отдáти по дéлом его; да не пáдше и облени́вшеся, но бóдрствующе и воздви́жени в дéлание обря́щемся готóви, в рáдость и Божéственный чертóг слáвы Егó совни́дем, идéже прáзднующих глас непрестáнный, и неизречéнная слáдость зря́щих Твоегó лицá добрóту неизречéнную. Ты бо еси́ и́стинный Свет, просвещáяй и освящáяй вся́ческая, и Тя поéт вся тварь во вéки векóв. Ами́нь.

Читайте так же:  Молитва Матрона Московская читать

Тя благослови́м, вы́шний Бóже и Гóсподи ми́лости, творя́щаго при́сно с нáми вели́кая же и неизслéдованная, слáвная же и ужáсная, и́хже несть числá, подáвшаго нам сон во упокоéние нéмощи нáшея, и ослаблéние трудóв многотру́дныя плóти. Благодари́м Тя, я́ко не погуби́л еси́ нас со беззакóньми нáшими, но человеколю́бствовал еси́ обы́чно, и в нечáянии лежáщия ны воздви́гл еси́, во éже славослóвити держáву Твою́. Тéмже мóлим безмéрную Твою́ блáгость, просвети́ нáша мы́сли, очесá, и ум наш от тя́жкаго сна лéности возстáви: отвéрзи нáша устá, и испóлни я Твоегó хвалéния, я́ко да возмóжем непоколéблемо пéти же и исповéдатися Тебé, во всех, и от всех слáвимому Бóгу, Безначáльному Отцу́ со Единорóдным Твои́м Сы́ном и Всесвяты́м и Благи́м и Животворя́щим Твои́м Ду́хом, ны́не и при́сно и во вéки векóв. Ами́нь.

Многоми́лостиве и Всеми́лостиве Бóже мой, Гóсподи Иису́се Христé, мнóгия рáди любвé сшел и воплоти́лся еси́, я́ко да спасéши всех. И пáки, Спáсе, спаси́ мя по благодáти, молю́ Тя; áще бо от дел спасéши мя, несть се благодáть и дар, но долг пáче. Ей, мнóгий в щедрóтах и неизречéнный в ми́лости! Вéруяй бо в Мя, рекл еси́, о Христé мой, жив бу́дет и не у́зрит смéрти во вéки. Áще у́бо вéра, я́же в Тя, спасáет отчáянныя, се вéрую, спаси́ мя, я́ко Бог мой еси́ Ты и Создáтель. Вéра же вмéсто дел да вмени́тся мне, Бóже мой, не обря́щеши бо дел отню́д оправдáющих мя. Но та вéра моя́ да довлéет вмéсто всех, та да отвещáет, та да оправди́т мя, та да покáжет мя причáстника слáвы Твоея́ вéчныя. Да не у́бо похи́тит мя сатанá, и похвáлится, Слóве, éже оттóргнути мя от Твоея́ руки́ и огрáды; но или́ хощу́, спаси́ мя, или́ не хощу́, Христé Спáсе мой, предвари́ скóро, скóро, погибóх: Ты бо еси́ Бог мой от чрéва мáтере моея́. Сподóби мя, Гóсподи, ны́не возлюби́ти Тя, я́коже возлюби́х иногдá той сáмый грех; и пáки порабóтати Тебé без лéности тóщно, я́коже порабóтах прéжде сатанé льсти́вому. Наипáче же порабóтаю Тебé, Гóсподу и Бóгу моему́ Иису́су Христу́, во вся дни животá моегó, ны́не и при́сно и во вéки векóв, ами́нь.

Святы́й Áнгеле, предстоя́й окая́нной моéй души́ и стрáстной моéй жи́зни, не остáви менé грéшнаго, нижé отступи́ от менé за невоздержáние моé. Не даждь мéста лукáвому дéмону обладáти мнóю, наси́льством смéртнаго сегó телесé; укрепи́ бéдствующую и худу́ю мою́ ру́ку и настáви мя на путь спасéния. Ей, святы́й Áнгеле Бóжий, храни́телю и покрови́телю окая́нныя моея́ души́ и тéла, вся мне прости́, ели́кими тя оскорби́х во вся дни животá моегó, и áще что согреши́х в прешéдшую нощь сию́, покры́й мя в настоя́щий день, и сохрани́ мя от вся́каго искушéния проти́внаго, да ни в кóем гресé прогнéваю Бóга, и моли́ся за мя ко Гóсподу, да утверди́т мя в стрáсе Своéм, и достóйна покáжет мя раба Своея́ блáгости. Ами́нь.

Пресвятáя Влады́чице моя́ Богорóдице, святы́ми Твои́ми и всеси́льными мольбáми отжени́ от менé смирéннаго и окая́ннаго рабá Твоегó уны́ние, забвéние, неразу́мие, нерадéние, и вся сквéрная, лукáвая и ху́льная помышлéния от окая́ннаго моегó сéрдца и от помрачéннаго умá моегó; и погаси́ плáмень страстéй мои́х, я́ко нищ есмь и окая́нен. И избáви мя от мнóгих и лю́тых воспоминáний и предприя́тий и от всех дéйств злых свободи́ мя. Я́ко благословéна еси́ от всех родóв, и слáвится пречестнóе и́мя Твоé во вéки векóв. Ами́нь.

Моли́ Бóга о мне, святы́й угóдниче Бóжий (имя), я́ко аз усéрдно к тебé прибегáю, скóрому помóщнику и моли́твеннику о душé моéй.

Богорóдице Дéво, рáдуйся, Благодáтная Мари́е, Госпóдь с Тобóю; благословéна Ты в женáх и благословéн плод чрéва Твоегó, я́ко Спáса родилá еси́ душ нáших.

Спаси́, Гóсподи, лю́ди Твоя́, и благослови́ достояние Твоé, побéды правослáвным христиáном на сопроти́вныя дáруя, и Твоé сохраняя Крестóм Твои́м жи́тельство.

Спаси́, Гóсподи, и поми́луй отцá моего́ духо́внаго (имя), роди́телей мои́х (имена), срóдников (имена), начáльников, настáвников, благодéтелей (имена их) и всех правослáвных христиáн.

Упокóй, Гóсподи, ду́ши усóпших раб Твои́х: роди́телей мои́х, срóдников, благодéтелей (имена их), и всех правослáвных христиáн, и прости́ им вся согрешéния вóльная и невóльная, и дáруй им Цáрствие Небéсное.

Достóйно есть я́ко вои́стинну блажи́ти Тя Богорóдицу, Присноблажéнную и Пренепорóчную и Мáтерь Бóга нáшего. Честнéйшую Херуви́м и славнéйшую без сравнéния Серафи́м, без истлéния Бóга Слóва рóждшую, су́щую Богорóдицу Тя величáем [1] .

Гóсподи Иису́се Христé, Сы́не Бóжий, моли́тв рáди Пречи́стыя Твоея́ Мáтере, преподóбных и богонóсных отéц нáших и всех святы́х поми́луй нас. Ами́нь.

[1] В дни двунадесятых праздников до их отдания вместо этой молитвы читаются особые задостойники.

Это замечание относится и к молитвам на сон грядущим.

В этом разделе представлены вечерние молитвы на церковнославянском языке выполненные современным шрифтом.

Во и́мя Отца́, и Сы́на, и Свята́го Ду́ха. Ами́нь.

Го́споди Иису́се Христе́, Сы́не Бо́жий, молитв ра́ди Пречи́стыя Твоея́ Ма́тере, преподо́бных и богоно́сных оте́ц на́ших и всех святы́х, поми́луй нас.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Tрижды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в.

Пресвята́я Тро́ице, поми́луй нас;

Го́споди, очи́сти грехи́ на́ша;

Влады́ко, прости́ беззако́ния на́ша;

Святы́й, посети́ и исцели́ не́мощи на́ша, и́мене Твоего́ ра́ди.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в.

О́тче наш, И́же еси́ на небесе́х!

Да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на небеси́ и на земли́.

Хлеб наш насу́щный даждь нам днесь;

и оста́ви нам до́лги на́ша, я́коже и мы оставля́ем должнико́м на́шим;

и не введи́ нас во искуше́ние, но изба́ви нас от лука́ваго.

Поми́луй нас, Го́споди, поми́луй нас;

вся́каго бо отве́та недоуме́юще, сию́ Ти моли́тву я́ко Влады́це гре́шнии прино́сим: поми́луй нас.

Читайте так же:  Молитвы семистрельной иконы

Сла́ва Отцу́ и Сы́ну и Свято́му Ду́ху.

Го́споди, поми́луй нас, на Тя бо упова́хом;

не прогне́вайся на ны зело́, ниже́ помяни́ беззако́ний на́ших, но при́зри и ны́не я́ко благоутро́бен, и изба́ви ны от враг на́ших;

Ты бо еси́ Бог наш, и мы лю́дие Твои́, вси́ дела́ ру́ку Твое́ю, и и́мя Твое́ призыва́ем.

И ны́не и при́сно и во ве́ки веко́в.

Милосе́рдия две́ри отве́рзи нам, благослове́нная Богоро́дице, наде́ющиися на Тя да не поги́бнем, но да изба́вимся Тобо́ю от бед: Ты бо еси́ спасе́ние ро́да христиа́нскаго.

Бо́же ве́чный и Царю́ вся́каго созда́ния, сподо́бивый мя да́же в час сей доспе́ти, прости́ ми грехи́, я́же сотвори́х в сей день де́лом, сло́вом и помышле́нием, и очи́сти, Го́споди, смире́нную мою́ ду́шу от вся́кия скве́рны пло́ти и ду́ха.

И да́ждь ми, Го́споди, в нощи́ сей сон прейти́ в ми́ре, да воста́в от смире́ннаго ми ло́жа, благоугожду́ пресвято́му и́мени Твоему́, во вся́ дни живота́ моего́, и поперу́ борю́щия мя враги́ плотски́я и безпло́тныя.

И изба́ви мя, Го́споди, от помышле́ний су́етных, оскверня́ющих мя, и по́хотей лука́вых.

Я́ко Твое́ е́сть ца́рство, и си́ла и сла́ва, Отца́ и Сы́на и Свята́го Ду́ха, ны́не и при́сно и во ве́ки веко́в.

Блага́го Царя́ блага́я Ма́ти, Пречи́стая и Благослове́нная Богоро́дице Мари́е, ми́лость Сы́на Твоего́ и Бо́га на́шего изле́й на стра́стную мою́ ду́шу и Твои́ми моли́твами наста́ви мя на дея́ния блага́я, да про́чее вре́мя живота́ моего́ без поро́ка прейду́ и Тобо́ю рай да обря́щу, Богоро́дице Де́во, еди́на Чи́стая и Благослове́нная.

А́нгеле Христо́в, храни́телю мой святы́й и покрови́телю души́ и те́ла моего́, вся́ ми прости́, ели́ка согреши́х во дне́шний день, и от вся́каго лука́вствия проти́внаго ми врага́ изба́ви мя, да ни в ко́емже гресе́ прогне́ваю Бо́га моего́;

но моли́ за мя гре́шнаго и недосто́йнаго раба́, я́ко да досто́йна мя пока́жеши бла́гости и ми́лости Всесвяты́я Тро́ицы и Ма́тере Го́спода моего́ Иису́са Христа́ и всех святы́х.

Взбра́нной Воево́де победи́тельная, я́ко изба́вльшеся от злых, благода́рственная воспису́ем Ти раби́ Твои́, Богоро́дице, но я́ко иму́щая держа́ву непобеди́мую, от вся́ких нас бед свободи́, да зове́м Ти;

ра́дуйся, Неве́сто Неневе́стная.

Пресла́вная Присноде́во, Ма́ти Христа́ Бо́га, принеси́ на́шу моли́тву Сы́ну Твоему́ и Бо́гу на́шему, да спасе́т Тобо́ю ду́ши на́ша.

Все упова́ние мое́ на Тя возлага́ю, Ма́ти Бо́жия, сохра́ни мя под кро́вом Твои́м.

огоро́дице Де́во, не пре́зри мене́, гре́шнаго, тре́бующа Твоея́ по́мощи и Твоего́ заступле́ния, на Тя бо упова́ душа́ мо́я, и поми́луй мя.

Упова́ние мое́ Оте́ц, прибе́жище мое́ Сын, покро́в мой Дух Святы́й: Тро́ице Свята́я, сла́ва Тебе́.

Досто́йно е́сть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего.

Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в.

Го́споди Иису́се Христе́, Сы́не Бо́жий, молитв ра́ди Пречи́стыя Твоея́ Ма́тере, преподо́бных и богоно́сных оте́ц на́ших и всех святы́х, поми́луй нас.

Во и́мя Отцá, и Сы́на, и Святáго Ду́ха. Ами́нь.

Го́споди Иису́се Христé, Сы́не Бóжий, моли́тв рáди Пречи́стыя Твоея́ Мáтере, преподóбных и богонóсных отéц нáших и всех святы́х, поми́луй нас. Ами́нь.

Слáва Тебé, Бóже наш, слáва Тебé.

Царю́ Небéсный, Утéшителю, Ду́ше и́стины, И́же вездé сый и вся исполня́яй, Сокрóвище благи́х и жи́зни Подáтелю, прииди́ и всели́ся в ны, и очи́сти ны от вся́кия сквéрны, и спаси́, Блáже, ду́ши нáша.

Святы́й Бóже, Святы́й Крéпкий, Святы́й Безсмéртный, поми́луй нас (трижды).

Слáва Отцу́ и Сы́ну и Святóму Ду́ху, и ны́не и при́сно и во вéки векóв. Ами́нь.

Пресвятáя Трóице, поми́луй нас; Гóсподи, очи́сти грехи́ нáша; Влады́ко, прости́ беззакóния нáша; Святы́й, посети́ и исцели́ нéмощи нáша, и́менé Твоегó рáди.

Óтче наш, И́же еси́ на небесéх! Да святи́тся и́мя Твоé, да прии́дет Царствие Твоé, да бу́дет во́ля Твоя, я́ко на небеси́ и на земли́. Хлеб наш насу́щный даждь нам днесь; и остáви нам дóлги нáша, я́коже и мы оставля́ем должникóм нáшим; и не введи́ нас во искушéние, но избáви нас от лукáваго.

Поми́луй нас, Гóсподи, поми́луй нас; вся́каго бо отвéта недоумéюще, сию́ Ти моли́тву я́ко Влады́це грéшнии принóсим: поми́луй нас.

Слава: Гóсподи, поми́луй нас, на Тя бо уповáхом; не прогнéвайся на ны зелó, нижé помяни́ беззакóний нáших, но при́зри и ны́не я́ко благоутрóбен, и избáви ны от враг нáших; Ты бо еси́ Бог наш, и мы лю́дие Твои́, вси делá руку́ Твоéю, и и́мя Твоé призывáем.

И ныне: Милосéрдия двéри отвéрзи нам, благословéнная Богорóдице, надéющиися на Тя да не поги́бнем, но да избáвимся Тобóю от бед: Ты бо еси́ спасéние рóда христиáнскаго.

Бóже вéчный и Царю́ вся́каго создáния, сподóбивый мя дáже в час сей доспéти, прости́ ми грехи́, я́же сотвори́х в сей день дéлом, слóвом и помышлéнием, и очи́сти, Гóсподи, смирéнную мою́ ду́шу от вся́кия сквéрны плóти и ду́ха. И даждь ми, Гóсподи, в нощи́ сей сон прейти́ в ми́ре, да востáв от смирéннаго ми лóжа, благоугожду́ пресвятóму и́мени Твоéму, во вся дни животá моегó, и поперу́ борю́щия мя враги́ плотски́я и безпло́тныя. И избáви мя, Го́споди, от помышлéний су́етных, оскверня́ющих мя, и пóхотей лукáвых. Я́ко Твоé есть Цáрство и си́ла и слáва, Отцá и Сы́на и Святáго Ду́ха, ны́не и при́сно и во вéки векóв. Ами́нь.

Вседержи́телю, Слóво Óтчее, Сам совершéн сый, Иису́се Христé, мнóгаго рáди милосéрдия Твоегó никогдáже отлучáйся менé, рабá Твоегó, но всегдá во мне почивáй. Иису́се, дóбрый Пáстырю Твои́х овéц, не предáждь менé крамолé змии́не, и желáнию сатанину́ не остáви менé, я́ко сéмя тли во мне есть. Ты у́бо, Гóсподи Бóже покланя́емый, Царю́ Святы́й, Иису́се Христé, спя́ща мя сохрани́ немерцáющим свéтом, Ду́хом Твои́м Святы́м, И́мже освятил еси́ Твоя́ ученики́. Даждь, Гóсподи, и мне, недостóйному рабу́ Твоéму, спасéние Твоé на лóжи моéм: просвети́ ум мой свéтом рáзума Святáго Евáнгелия Твоегó, ду́шу любóвию Крестá Твоегó, сéрдце чистотóю словесé Твоегó, тéло моé Твоéю стрáстию безстрáстною, мы́сль мою́ Твои́м смирéнием сохрани́, и воздви́гни мя во врéмя подóбно на Твоé славослóвие. Я́ко препрослáвлен еси́ со Безначáльным Твои́м Отцéм и с Пресвяты́м Ду́хом во вéки. Ами́нь.

Гóсподи Бóже наш, éже согреши́х во дни сем слóвом, дéлом и помышлéнием, я́ко Благ и Человеколю́бец прости́ ми. Ми́рен сон и безмятéжен дáруй ми. Áнгела Твоегó храни́теля посли́, покрывáюща и соблюдáюща мя от вся́каго зла, я́ко Ты еси́ Храни́тель душáм и телесéм нáшим, и Тебé слáву возсылáем, Отцу́ и Сы́ну и Святóму Ду́ху, ны́не и при́сно и во вéки векóв. Ами́нь.

Гóсподи Бóже наш, в Негóже вéровахом, и Егóже и́мя пáче вся́каго и́менé призывáем, даждь нам, ко сну отходя́щим, ослáбу души́ и тéлу, и соблюди́ нас от вся́каго мечтáния, и тéмныя слáсти кромé; устáви стремлéние страстéй, угаси́ разжжéния востáния телéснаго. Даждь нам целому́дренне пожи́ти дéлы и словесы́; да добродéтельное жи́тельство восприéмлюще, обетовáнных не отпадéм благи́х Твои́х, я́ко Благословéн еси́ во вéки. Ами́нь.

Читайте так же:  Заговор молитва от тоски по любимому
Видео (кликните для воспроизведения).

1 Гóсподи, не лиши́ менé небéсных Твои́х благ. 2 Гóсподи, избáви мя вéчных мук. 3 Гóсподи, умóм ли или́ помышлéнием, слóвом или дéлом согреши́х, прости́ мя. 4 Гóсподи, избáви мя вся́каго невéдения и забвéния, и малоду́шия, и окаменéннаго нечу́вствия. 5 Гóсподи, избáви мя от вся́каго искушéния. 6 Гóсподи, просвети́ моé сéрдце, éже помрачи́ лукáвое похотéние. 7 Гóсподи, аз я́ко человéк согреши́х, Ты же, я́ко Бог Щедр, поми́луй мя, ви́дя нéмощь души́ моея́. 8 Гóсподи, посли́ благодáть Твою́ в пóмощь мне, да прослáвлю и́мя Твоé святóе. 9 Гóсподи Иису́се Христé, напиши́ мя рабá Твоегó в кни́зе живóтней и дáруй ми конéц благи́й. 10 Гóсподи Бóже мой, áще и ничтóже благо сотвори́х пред Тобóю, но даждь ми по благодáти Твоéй положи́ти начáло блáгое. 11 Гóсподи, окропи́ в сéрдце моéм росу́ благодáти Твоея́. 12 Гóсподи небесé и земли́, помяни́ мя грéшнаго рабá Твоегó, сту́днаго и нечи́стаго, во Цáрствии Твоéм. Ами́нь.

1 Гóсподи, в покая́нии приими́ мя. 2 Гóсподи, не остáви менé. 3 Гóсподи, не введи́ менé в напáсть. 4 Гóсподи, даждь ми мы́сль блáгу. 5 Гóсподи, даждь ми слéзы, и пáмять смéртную, и умилéние. 6 Гóсподи, даждь ми пóмысл исповéдания грехóв мои́х. 7 Гóсподи, даждь ми смирéние, целому́дрие и послушáние. 8 Гóсподи, даждь ми терпéние, великоду́шие и крóтость. 9 Гóсподи, всели́ в мя кóрень благи́х, страх Твой в сéрдце моé. 10 Гóсподи, сподóби мя люби́ти Тя от всея́ души́ моея́, и помышлéния и твори́ти во всем вóлю Твою́. 11 Гóсподи, покрый мя от человéк нéкоторых, и бесóв, и страстéй, и от вся́кия ины́я неподóбныя вéщи. 12 Гóсподи, веси́, я́ко твори́ши, я́коже Ты вóлиши, да бу́дет вóля Твоя́ и во мне грéшнем, я́ко Благословéн еси́ во вéки. Ами́нь.

Гóсподи Иису́се Христé, Сы́не Бóжий, рáди честнéйшия Мáтере Твоея́, и безплóтных Твои́х Áнгел, Проро́ка же и Предтéчи и Крести́теля Твоегó, богоглагóливых же апóстол, свéтлых и добропобéдных му́ченик, преподóбных и богонóсных отéц, и всех святы́х моли́твами, избáви мя настоя́щаго обстоя́ния бесóвскаго. Ей, Гóсподи мой Твóрче, не хотя́й смéрти грéшнаго, но я́коже обрати́тися и жи́ву бы́ти ему́, даждь и мне обращéние окая́нному и недостóйному; изми́ мя от уст пáгубнаго зми́я, зия́ющаго пожрéти мя и свести́ во ад жи́ва. Ей, Гóсподи мой, утешéние моé, И́же менé рáди окая́ннаго в тлéнную плоть оболки́йся, истóргни мя от окая́нства, и утешéние подáждь души́ моéй окая́нней. Всади́ в сéрдце моé твори́ти Твоя́ повелéния, и остáвити лукáвая дея́ния, и получи́ти блажéнства Твоя́: на Тя бо, Гóсподи, уповáх, спаси́ мя.

К Тебé Пречи́стей Бóжией Мáтери аз окая́нный припáдая молю́ся: веси́, Цари́це, я́ко безпрестáни согрешáю и прогневля́ю Сы́на Твоегó и Бóга моегó, и многажды áще кáюся, лож пред Бóгом обретáюся, и кáюся трепещá: не ужéли Госпóдь порази́т мя, и по часé пáки тáяжде творю́; вéдущи сия́, Влады́чице моя́ Госпожé Богорóдице, молю́, да поми́луеши, да укрепи́ши, и благáя твори́ти да подáси ми. Веси́ бо, Влады́чице моя́ Богорóдице, я́ко отню́д и́мам в нéнависти злáя моя́ делá, и всéю мы́слию люблю́ закóн Бóга моегó; но не вем, Госпожé Пречи́стая, отку́ду я́же ненави́жду, та и люблю́, а благáя преступáю. Не попущáй, Пречи́стая, вóли моéй совершáтися, не угóдна бо есть, но да бу́дет вóля Сы́на Твоегó и Бóга моегó: да мя спасéт, и вразуми́т, и подáст благодáть Святáго Ду́ха, да бых аз отсéле престáл сквернодéйства, и прóчее пожи́л бых в повелéнии Сы́на Твоегó, Ему́же подобáет вся́кая слáва, честь и держáва, со Безначáльным Егó Отцéм и Пресвяты́м и Благи́м и Животворя́щим Егó Ду́хом, ны́не и при́сно и во вéки векóв, ами́нь.

Благáго Царя́ благáя Мáти, Пречи́стая и Благословéнная Богорóдице Мари́е, ми́лость Сы́на Твоегó и Бóга нáшего излéй на стрáстную мою́ ду́шу и Твои́ми моли́твами настáви мя на дея́ния благáя, да прóчее врéмя животá моегó без порóка прейду́ и Тобóю рай да обря́щу, Богорóдице Дéво, еди́на Чи́стая и Благословéнная.

Áнгеле Христóв, храни́телю мой святы́й и покрови́телю души́ и тéла моегó, вся ми прости́, ели́ка согреши́х во днéшний день, и от вся́каго лукáвствия проти́внаго ми врáга избáви мя, да ни в кóемже гресé прогнéваю Бóга моегó; но моли́ за мя грéшнаго и недостóйнаго рабá, я́ко да достóйна мя покáжеши блáгости и ми́лости Всесвяты́я Трóицы и Мáтере Гóспода моегó Иису́са Христá и всех святы́х. Ами́нь.

Взбрáнной Воевóде победи́тельная, я́ко избáвльшеся от злых, благодáрственная воспису́ем Ти раби́ Твои́, Богорóдице, но я́ко иму́щая держáву непобеди́мую, от вся́ких нас бед свободи́, да зовéм Ти́: рáдуйся, Невéсто Неневéстная.

Преслáвная Приснодéво, Мати́ Христá Бóга, принеси́ нáшу моли́тву Сы́ну Твоему́ и Бóгу нáшему, да спасéт Тобóю ду́ши нáша.

Все уповáние моé на Тя возлагáю, Мáтии Бóжия, сохрани́ мя под крóвом Твои́м.

Богорóдице Дéво, не прéзри менé грéшнаго, трéбующа Твоея́ пóмощи и Твоегó заступлéния, на Тя бо уповá душá моя́, и поми́луй мя.

Уповáние моé Отéц, прибéжище моé Сын, покрóв мой Дух Святы́й: Трóице Святáя, слáва Тебé.

Достóйно есть я́ко вои́стинну блажи́ти Тя, Богорóдицу, Присноблажéнную и Пренепорóчную и Мáтерь Бóга нáшего. Честнéйшую Херуви́м и славнéйшую без сравнéния Серафи́м, без истлéния Бóга Слóва рóждшую, су́щую Богорóдицу Тя величáем.

Гóсподи Иису́се Христé, Сы́не Бóжий, моли́тв рáди Пречи́стыя Твоея́ Мáтере, преподóбных и богонóсных отéц нáших и всех святы́х, поми́луй нас. Ами́нь.

Влады́ко Человеколю́бче, не ужéли мне одр сей гроб бу́дет, или́ ещé окая́нную мою́ ду́шу просвети́ши днем? Се ми гроб предлежи́т, се ми смерть предстои́т. Судá Твоегó, Гóсподи, бою́ся и му́ки безконéчныя, злóе же творя́ не престаю́: Тебé Гóспода Бóга моегó всегдá прогневля́ю, и Пречи́стую Твою́ Мáтерь, и вся Небéсныя Си́лы, и святáго Áнгела, храни́теля моегó. Вем у́бо, Гóсподи, я́ко недостóин есмь человеколю́бия Твоегó, но достóин есмь вся́каго осуждéния и му́ки. Но, Гóсподи, или́ хощу́, или́ не хощу́, спаси́ мя. Áще бо прáведника спасéши, ничтóже вéлие; и áще чи́стаго поми́луеши, ничто́же ди́вно: досто́йни бо суть ми́лости Твоея́. Но на мне грéшнем удиви́ ми́лость Твою́: о сем яви́ человеколю́бие Твоé, да не одолéет моя́ злóба Твоéй неизглагóланней блáгости и милосéрдию: и я́коже хóщеши, устрóй о мне вещь.

Просвети́ óчи мои́, Христé Бóже, да не когдá усну́ в смерть, да не когдá речéт враг мой: укрепи́хся на негó.

Слава: Засту́пник души́ моея́ бу́ди, Бо́же, я́ко посредé хожду́ сетéй мнóгих; избáви мя от них и спаси́ мя, Блáже, я́ко Человеколю́бец.

Читайте так же:  Молитва вагітної для збереження вагітності

И ныне: Преслáвную Бóжию Мáтерь, и святы́х Áнгел Святéйшую, немóлчно воспои́м сéрдцем и усты́, Богорóдицу Сию́ исповéдающе, я́ко вои́стинну рóждшую нам Бóга воплощéнна, и моля́щуюся непрестáнно о душáх нáших.

Также целуй крест твой, и знаменуй крестом место твое от головы до ног, также и со всех сторон, и говори молитву Честнóму Кресту:

Да воскрéснет Бог, и расточáтся врази́ Его́, и да бежáт от лицá Егó ненави́дящии Егó. Я́ко исчезáет дым, да исчéзнут; я́ко тáет воск от лицá огня́, тáко да поги́бнут бéси от лицá лю́бящих Бóга и знáменующихся крéстным знáмением, и в весéлии глагóлющих: рáдуйся, Пречестны́й и Животворя́щий Крéсте Госпóдень, прогоня́яй бéсы си́лою на тебé пропя́таго Гóспода нáшего Иису́са Христá, во ад сшéдшаго и попрáвшаго си́лу диáволю, и даровáвшаго нам тебé Крест Свой Честны́й на прогнáние вся́каго супостáта. О, Пречестны́й и Животворя́щий Крéсте Госпóдень! Помогáй ми со Святóю Госпожéю Дéвою Богорóдицею и со всéми святы́ми во вéки. Ами́нь.

Огрáди мя, Гóсподи, си́лою Честнáго и Животворя́щаго Твоегó Крестá, и сохрани́ мя от вся́каго зла.

Ослáби, остáви, прости́, Бóже, прегрешéния нáша, вóльная и невóльная, я́же в слóве и в дéле, я́же в вéдении и не в вéдении, я́же во дни и в нощи́, я́же во умé и в помышлéнии: вся нам прости́, я́ко Благ и Человеколю́бец.

Ненави́дящих и оби́дящих нас прости́, Гóсподи Человеколю́бче. Благотворя́щим благосотвори́. Брáтиям и срóдником нáшим дáруй я́же ко спасéнию прошéния и жизнь вéчную. В нéмощех су́щия посети́ и исцелéние дáруй. И́же на мóри упрáви. Путешéствующим спутешéствуй. Служáщим и ми́лующим нас грехóв оставлéние дáруй. Заповéдавших нам недостóйным моли́тися о них поми́луй по вели́цей Твоéй ми́лости. Помяни́, Гóсподи, прéжде усóпших отéц и брáтий нáших и упóкой их, идéже присещáет свет лицá Твоегó. Помяни́, Гóсподи, брáтий нáших пленéнных и избáви я от вся́каго обстоя́ния. Помяни́, Гóсподи, плодонося́щих и добродéлающих во Святы́х Твои́х Цéрквах, и даждь им я́же ко спасéнию прошéния и жизнь вéчную. Помяни́, Гóсподи, и нас, смирéнных и грéшных и недостóйных раб Твои́х, и просвети́ наш ум свéтом рáзума Твоегó, и настáви нас на стезю́ зáповедей Твои́х, моли́твами Пречи́стыя Влады́чицы нáшея Богорóдицы и Приснодéвы Мари́и и всех Твои́х святы́х: я́ко Благословéн еси́ во вéки векóв. Ами́нь.

Исповéдаю Тебé Гóсподу Бóгу моему́ и Творцу́, во Святéй Трóице Еди́ному, слáвимому и покланя́емому, Отцу́ и Сы́ну и Святóму Ду́ху, вся моя́ грехи, я́же содéях во вся дни животá моегó, и на вся́кий час, и в настоя́щее врéмя, и в прешéдшия дни и нóщи, дéлом, слóвом, помышлéнием, объядéнием, пия́нством, тайноядéнием, празднослóвием, уны́нием, лéностию, прекослóвием, непослушáнием, оклеветáнием, осуждéнием, небрежéнием, самолю́бием, многостяжáнием, хищéнием, неправдоглагóланием, скверноприбы́тчеством, мшелои́мством, ревновáнием, зáвистию, гнéвом, памятозлóбием, нéнавистию, лихои́мством и всéми мои́ми чу́вствы: зрéнием, слу́хом, обоня́нием, вку́сом, осязáнием и прóчими мои́ми грехи́, душéвными вку́пе и телéсными, и́миже Тебé Бóга моегó и Творцá прогнéвах, и бли́жняго моегó онепрáвдовах: о сих жалéя, ви́нна себé Тебé Бóгу моему́ представля́ю, и имéю вóлю кáятися: тóчию, Гóсподи Бóже мой, помози́ ми, со слезáми смирéнно молю́ Тя: прешéдшая же согрешéния моя́ милосéрдием Твои́м прости́ ми, и разреши́ от всех сих, я́же изглагóлах пред Тобóю, я́ко Благ и Человеколю́бец.

По обычнем начале глаголем:

За молитв святых отец наших, Господи Исусе Христе, Сыне Божии, помилуй нас.

Псаломщик глаголет кротким и равным гласом с тихостию, и со всяким вниманием и со страхом Божиим во услышание всем: Аминь.

Царю Небесныи, Утешителю, Душе Истинныи, Иже везде сыи, и вся исполняя, сокровище благих, и жизни Подателю, прииди и вселися в ны, и очисти ны от всякия скверны, и спаси Блаже, душа наша.

Святыи Боже, Святыи Крепкии, Святыи Безсмертныи, помилуй нас (трижды, и поклоны три).

Слава Отцу и Сыну и Святому Духу, и ныне и присно и во веки веком, аминь.

Пресвятая Троице, помилуй нас. Господи, очисти грехи наша. Владыко, прости беззакония наша. Святыи, посети и исцели немощи наша, имене Твоего ради.

Слава Отцу и Сыну и Святому Духу, ныне и присно и во веки веком, аминь.

Отче наш, Иже еси на небесех, да святится имя Твоеда приидет царствие Твое, да будет воля Твоя, яко на небеси и на земли, хлеб наш насущныи даждь Нам днесь, и остави нам долги наша, яко же и мы оставляем должником нашим, и не введи нас во искушение, но избави нас от лукаваго.

Господи Исусе Христе, Сыне Божии, помилуй нас. Аминь.

Господи помилуй, 12. Слава, и ныне.

Приидите, поклонимся Цареви нашему Богу (поклон).

Приидите, поклонимся Христу, Цареви и Богу нашему (поклон).

Приидите, поклонимся и припадем к самому Господу Исусу Христу, Цареви и Богу нашему (поклон).

Таже, псалом 103

По конце псалма рцы стих: Яко возвеличишася дела Твоя Господи, вся премудростию сотворил еси.

Аллилуия, Аллилуия, слава Тебе, Боже (три и поклоны три).

Господи помилуй 12, Слава, и ныне. Кафисма рядовая.

Егда же бывает малая вечерня, и по псалме глаголем: Слава, и ныне. Аллилуия, Аллилуия, слава Тебе, Боже (трижды). Господи помилуй (трижды). Слава, и ныне.

Таже псалом 140

Господи возвах к Тебе, услыши мя. Воньми глас молитвы моея, егда воззову к Тебе. Да ся исправит молитва моя, яко кадило пред Тобою, воздеяние руку моею: жертва вечерняя. Положи Господи, хранение устом моим, и дверь ограждения о устнах моих. Не уклони сердце мое в словеса лукавствия, непщевати вины о гресех. С человеки творящими беззаконие, и не счетаюся со избранными их. Покажет мя праведник милостию, и обличит мя. Елей же грешнаго, да не намастит главы моея. Яко еще и молитва моя во благоволениих их. Пожерты быша при камени судии их. Услышатся глаголи мои, яко возмогоша, яко толща земли проседеся на земли, разсыпашася кости их при аде. Яко к Тебе Господи, Господи очи мои, на Тя уповах, не отъими душу мою. Сохрани мя от сети юже составиша ми, и от соблазн делающих беззаконие. Впадутся во мрежу свою грешницы, един есмь аз дондеже преиду.

Гласом моим ко Господу возвах, гласом моим ко Господу помолюся. Пролию пред Ним молитву мою, и печаль мою пред ним возвещу. Внегда исчезает дух мой, и Ты позна стези мои. На пути сем, по нему же хождах, скрыша сеть мне. Смотрях одесную и возглядах, и небе знаяи мене. Погибе бегство от мене, и несть взыскаяи душу мою. Возвах к Тебе Господи, рек: Ты еси упование мое, часть моя еси на земли живых. Воньми молитву мою, яко смирихся зело. Избави мя от гонящих мя, яко укрепишася паче мене. Изведи из темницы душу мою, исповедатися имени Твоему. Мене ждут праведницы, дондеже воздаси мне.

Читайте так же:  Молитва православная чтобы найти работу

Из глубины возвах к Тебе Господи, Господи, услыши глас мой. Будете уши Твои, внемлюще глас молитвы моея. Аще беззакония назриши Господи, Господи, кто постоит, яко от Тебе очищение есть. Имене ради Твоего потерпех Тя Господи, потерпе душа моя в слово Твое, упова душа моя на Господа. От стражи утрения до нощи, от стражи утрения, да уповает Израиль на Господа. Яко от Господа милость, и много от Него избавление: и Той избавит Израиля от всех беззаконий его.

Хвалите Господа вси языцы, похвалите Его вси людие. Яко утвердися милость Его на нас, и истина Господня пребывает во веки.

Таже, стихеры настоянного дня по уставу. Посем, сей стих, творение святаго священномученика Анфиногена.

Свете тихии, святыя славы, безсмертнаго Отца небеснаго, святаго блаженнаго, Исуса Христа, Сына Божия, пришедшаго на запад солнцу, видевше свет вечернии, поем Отца и Сына и Святаго Духа, Бога. Достоин еси во вся времена, пет быти гласы преподобными, Сыне Божии, живот даяи всему мiру: его же ради весь мiр славит Тя.

Таже, прокимны дневныя. В субботу вечер прокимен: Господь воцарися, в лепотуся облече.

Стих первыи. Облечеся Господь в силу, и препоясася.

Стих вторыи. Ибо утверди вселенную, яже не подвижится.

Стих третии. Дому Твоему подобает, святыни Господи в долготу днии.

В неделю вечер: Се ныне благословите Господа вси раби Господни.

Стих. Стоящии в храме Господни, во дворех дому Бога нашего.

В понедельник вечер: Господь услышит мя, егда взову к Нему.

Стих. Внегда возвах, услыша мя Боже правды моея.

Во вторник вечер: Милость Твоя Господи, поженет мя, во вся дни живота моего.

Стих. Господь пасет мя, и ничто же мя лишит.

В среду вечер: Боже, во имя Твое спаси мя, и в силе Твоей суди ми.

Стих. Боже, услыши молитву мою, внуши глаголы уст моих.

В четверток вечер: Помощь моя от Господа, сотворшаго небо и землю.

Стих. Возведох очи мои в горы, отнюду же приидет помощь моя.

В пяток вечер: Боже, заступник мой еси Ты, и милость Твоя предварит мя.

Стих. Изми мя от враг моих Боже, и от востающих на мя избави мя.

Егда же несть тропаря святому, тогда поем Аллилуию, на глас 6. Стихи же глаголем сия:

В понедельник вечер: Господи, не яростию Твоею обличи мене, ни гневом Твоим покажеши мене.

Во вторник и в четверток вечер: Возносите Господа Бога нашего, и кланяйтеся подножию ногу Его, яко свято есть.

В среду вечер: Во всю землю изыде вещание их, и в концы вселенныя глаголы их.

Аще ли суббота за упокой, поем: Аллилуия, Аллилуия, Аллилуия, на глас 8.

Стих. Блажени яже избра и прият я Господь.

Стих. Память их от рода в род.

Стих. Душа их во благих водворятся.

И еще стих. Аллилуия, Аллилуия, Аллилуия.

По прокимне, или по ектении, или по аллилуии псаломшик глаголет: Сподоби Господи, в вечер сей, без греха сохранитися нам (поклон). Благословен еси Господи Боже отец наших (поклон), и хвально и прославлено имя Твое во веки, аминь (поклон). Буди Господи, милость Твоя на нас, якоже уповахом на Тя. Благословен еси Господи, научи нас оправданием Твоим; благословен еси Владыко, вразуми нас оправданием Твоим; благословен еси Святыи, просвети нас оправданием Твоим. Господи, милость Твои во веки, и дела руку Твоею не презри. Тебе подобает хвала, Тебе подобает пение. Тебе слава подобает, Отцу и Сыну и Святому Духу, ныне и присно и во веки веком, аминь.

Таже ектения. И на стиховне стихеры, по уставу.

Таже, молитва святаго Симеона Богоприимца: Ныне отпущаеши раба Твоего Владыко, по глаголу Твоему с миром, яко видеста очи мои спасение Твое, еже еси уготовал пред лицем всех людей, свет во откровение языком, и славу людий Твоих Израиля.

Таже, Трисвятое, и по Отче наш…

Тропарь по уставу. Посем ектения. И отпуст.

Аще ли есть пост, или егда поем Аллилуиа, глаголем тропари сия, глас 4.

Богородице Дево, радуися, обрадованная Марие, Господь с Тобою, благословена Ты в женах, и благословен плод чрева Твоего, яко родила еси Христа Спаса, Избавителя душам нашим (поклон земной).

Слава: Крестителю Христов, тебе молимся: всех нас помяни, да избавимся от беззаконии наших. Тебе бо дана бысть благодать, молитися за мы (поклон земной).

И ныне: Молите за ны святии апостоли, пророцы, и мученицы, и вси святии, да избавимся от бед и скорбей, вас бо теплыя предстатели ко Спасу вси стяжахом (поклон земной).

Таже, Богородичен: Под Твою милость прибегаем, Богородице Дево, молитв наших не презри в скорбех. Но от бед избави нас, едина Чистая и Благословеная (без поклона).

Господи помилуй 40, кротким и тихим гласом. Господи благослови.

Небесныи Царю, державу нашу укрепи, веру утверди, языки укроти, мiр умири, и святыи храм сей добре сохрани, и прежде отшедшия, отцы и братию нашу, в кровех с праведными учини. И нас в православней вере и в покаянии Господи, приими и помилуй, яко Благ и Человеколюбец.

Таже, Господи помилуй, трижды.

Честнейшую херувим, и славнейшую воистину серафим, без истления Бога Слова рождьшую, сущую Богородицу Тя величаем (поклон земной).

Именем Господним благослови, отче.

За молитв святых отец наших, Господи Исусе Христе, Сыне Божии, помилуй нас. Аминь.

И глаголем молитву святаго Ефрема Сирина, творя поклоны земные.

Господи и Владыко животу моему, дух уныния, небрежения, сребролюбия и празднословия, отжени от мене (поклон великий).

Дух же целомудрия, смирения, терпения и любве, даруй ми рабу Твоему (поклон великий).

Ей, Господи Царю, даждь ми зрети моя согрешения, и еже не осуждати брата моего, яко благословен еси во веки, аминь (поклон великий).

И прочих поклонов 12, глаголюще в себе: Господи Исусе Христе, Сыне Божии, помилуй мя грешнаго (дважды с поклоны); Боже, милостив буди мне грешному (поклон). Боже, очисти грехи моя и помилуй мя (поклон). Создавыи мя Господи, помилуй (поклон). Без числа согреших Господи, прости мя (поклон). И паки, скончав поклоны, глаголем молитву всю выше писаную: Господи и Владыко животу моему (поклон великий един).

И по сем, Трисвятое, и по Отче наш… Господи помилуй 12. Слава, и ныне. Господи помилуй (дважды), Господи благослови. И отпуст седмичный.

Видео (кликните для воспроизведения).

Господи помилуй (трижды). Исходные поклоны.

Текст православной вечерней молитвы
Оценка 5 проголосовавших: 1

ОСТАВЬТЕ ОТВЕТ

Please enter your comment!
Please enter your name here